खामखेडा परिसरात बिबट्याचा धुमाकूळ; बकऱ्या व कुत्रे फस्त, शेतकऱ्यांत भीतीचे वातावरण; पिंजरा लावण्याची मागणी..!

खामखेडा परिसरात बिबट्याचा धुमाकूळ; बकऱ्या व कुत्रे फस्त, शेतकऱ्यांत भीतीचे वातावरण; पिंजरा लावण्याची मागणी..!

देवळा तालुक्यातील खामखेडा येथे बिबट्याने शेतात शिरून बकरी व कुत्र्यावर हल्ला करून त्यांना फस्त केल्याची घटना घडल्याने परिसरात भीतीचे वातावरण पसरले आहे. या घटनेमुळे ग्रामस्थांमध्ये मोठी दहशत निर्माण झाली असून बिबट्याला पकडण्यासाठी तातडीने पिंजरा लावण्याची मागणी करण्यात येत आहे.
मिळालेल्या माहितीनुसार, खामखेडा (ता. देवळा) येथील शेतकरी प्रभाकर बारकू शेवाळे यांच्या गट क्रमांक १६९ मधील शेतात रात्रीच्या सुमारास बिबट्याने हल्ला करून काही बकऱ्या व एक कुत्रा फस्त केल्याची घटना उघडकीस आली. सकाळी ही बाब लक्षात आल्यानंतर परिसरातील नागरिकांनी घटनास्थळी धाव घेतली.
घटनेची माहिती मिळताच वनविभागाच्या अधिकाऱ्यांनी घटनास्थळी भेट देऊन पाहणी केली असून संबंधित नुकसानीचा पंचनामा करण्यात आला आहे.
दरम्यान, खामखेडा व परिसरात बिबट्याचा वावर वाढल्याची चर्चा असून शेतकरी व नागरिकांमध्ये भीतीचे वातावरण निर्माण झाले आहे. त्यामुळे वनविभागाने तात्काळ उपाययोजना करून बिबट्याला पकडण्यासाठी पिंजरा लावावा, अशी मागणी ग्रामस्थांकडून करण्यात येत आहे.
वनविभागाने नागरिकांनी रात्रीच्या वेळी शेतात किंवा एकटे फिरताना सावधगिरी बाळगावी, असे आवाहनही केले आहे.

फोटो -संग्रहित आहे