RBSK अभियानाचा मोठा टप्पा : सुरगाण्यातील १९ विद्यार्थ्यांच्या मोफत शस्त्रक्रिया व उपचारांचा मार्ग मोकळा

RBSK अभियानाचा मोठा टप्पा : सुरगाण्यातील १९ विद्यार्थ्यांच्या मोफत शस्त्रक्रिया व उपचारांचा मार्ग मोकळा

राष्ट्रीय बाल स्वास्थ्य कार्यक्रमांतर्गत (RBSK) दुर्गम भागातील बालकांच्या आरोग्यासाठी राबविण्यात येणाऱ्या मोहिमेला सुरगाणा तालुक्यात मोठे यश मिळाले आहे. सुरगाणा ग्रामीण रुग्णालय स्तरावर नुकत्याच आयोजित करण्यात आलेल्या विशेष शस्त्रक्रिया पूर्व तपासणी शिबिरात एकूण ४५ बालकांची सखोल वैद्यकीय तपासणी करण्यात आली. यापैकी विविध आजारांचे निदान झालेल्या १९ गरजू विद्यार्थ्यांना पुढील शस्त्रक्रियेसाठी आज नाशिक येथे पाठवण्यात आले आहे.
नाशिकचे नव्याने नियुक्त जिल्हा शल्यचिकित्सक डॉ. निलेश पाटील यांच्या मार्गदर्शनाखाली हा उपक्रम राबविण्यात येत आहे. या १७ विद्यार्थ्यांच्या सर्व शस्त्रक्रिया, आवश्यक वैद्यकीय तपासण्या तसेच शस्त्रक्रियेनंतरचे औषधोपचार महात्मा ज्योतिराव फुले जन आरोग्य योजना व आयुष्मान भारत–प्रधानमंत्री जन आरोग्य योजना अंतर्गत पूर्णतः मोफत केले जाणार आहेत. यासाठी नाशिक येथील नामवंत रेडियंट हॉस्पिटलला RBSK कार्यक्रमांतर्गत संलग्न करण्यात आले असून संबंधित विद्यार्थ्यांना तेथे दाखल करण्यात आले आहे.
या संपूर्ण प्रक्रियेत नाशिक येथील निवासी वैद्यकीय अधिकारी डॉ. संदीप सूर्यवंशी व डॉ. अनंत पवार यांचे विशेष सहकार्य लाभले. सुरगाणा ग्रामीण रुग्णालयाचे वैद्यकीय अधीक्षक डॉ. संजय चौधरी यांनी शिबिराचे प्रभावी नियोजन केले. तसेच श्री. दीपक चौधरी, संदीप पाटील व उद्धव हंडोरे यांनी समन्वयाची जबाबदारी पार पाडत विद्यार्थ्यांना रुग्णालयात दाखल करेपर्यंत विशेष परिश्रम घेतले.
ग्रामीण रुग्णालय सुरगाणा येथील RBSK अधिकारी व कर्मचाऱ्यांच्या सातत्यपूर्ण प्रयत्नांमुळे ४५ लाभार्थ्यांची तपासणी यशस्वीरीत्या पूर्ण होऊ शकली. दुर्गम व आर्थिकदृष्ट्या दुर्बल कुटुंबातील पालकांना शासकीय योजनांची माहिती देऊन आवश्यक कागदपत्रांची पूर्तता करण्यात आली आणि १७ बालकांच्या शस्त्रक्रियेचा मार्ग मोकळा झाला.
जन्मजात व्यंग किंवा अन्य शस्त्रक्रियांची गरज असलेल्या बालकांना अद्ययावत सुविधा व महागडे औषधोपचार मोफत मिळणार असल्याने पालकांनी समाधान व्यक्त केले आहे. शासकीय योजनांच्या प्रभावी अंमलबजावणीमुळे या बालकांना नवजीवन मिळणार असल्याची भावना परिसरात व्यक्त होत आहे.