डांगमधील कोशीमपाटळ–धोधळपाडा गावात मोठी कारवाई ७.६० लाखांचा सागवानासह मुद्देमाल जप्त

डांगमधील कोशीमपाटळ–धोधळपाडा गावात मोठी कारवाई
७.६० लाखांचा सागवानासह मुद्देमाल जप्त

डांग जिल्ह्यातील कोशीमपाटळ व धोधळपाडा गावात वनविभाग आणि पोलिसांनी संयुक्तपणे राबविलेल्या मोठ्या कारवाईत सागवानासह एकूण ७ लाख ६० हजार रुपयांचा मुद्देमाल जप्त करण्यात आला आहे. डांग वनविभागाचे डी.सी.एफ. नीरजकुमार आणि डांग जिल्हा पोलीस अधीक्षक पूजा यादव यांच्या मार्गदर्शनाखाली ही कारवाई करण्यात आली.
दि. ३१ जानेवारी २०२६ रोजी चिचिनागांवठा रेंज अंतर्गत बोरिगांवठा गावात घडलेल्या लाकूड चोरी व वनकर्मचाऱ्याच्या हत्येच्या गंभीर घटनेनंतर प्रशासन पूर्णपणे सतर्क झाले होते. या पार्श्वभूमीवर नायब वनसंरक्षकांच्या मार्गदर्शनाखाली मदतनीस वनसंरक्षक, बोटॅनिकल गार्डनचे अधीक्षक, नायब पोलीस अधीक्षक व वघई पोलीस निरीक्षक यांच्या नेतृत्वाखाली १२० वनकर्मचारी व ५६ पोलीस जवानांचे पथक तयार करून कोशीमपाटळ व धोधळपाडा गावात सघन तपासमोहीम राबविण्यात आली.
तपासादरम्यान या दोन्ही गावांतील घरे व परिसरात परवानगीशिवाय बेकायदेशीरपणे साठवून ठेवलेला लाकडाचा मोठा साठा आढळून आला. यामध्ये अंदाजे ७ लाख रुपये किमतीचे ९२ नग (७.५७५ घनमीटर) जुने सागी (सागवान) लाकूड तसेच ३० हजार रुपये किमतीचे ७ नग इतर प्रकारचे लाकूड जप्त करण्यात आले.
याशिवाय लाकूड कापण्यासाठी वापरण्यात येणारे १ लाकूड कापण्याचे मशीन, १ रंधा मशीन, २ कटर तसेच १ सायकल अशी साधनेही वनविभागाने ताब्यात घेतली आहेत.
वनकायद्याअंतर्गत पुढील तपास व कारवाई सुरू असल्याची माहिती अधिकाऱ्यांनी दिली आहे.