महाराष्ट्रातून चोरी केलेल्या दोन पिकअप सह दोन सराईत चोरटे जेरबंद वघई पोलिसांची आंतरराज्य वाहन चोरी उघड

महाराष्ट्रातून चोरी केलेल्या दोन पिकअप सह दोन सराईत चोरटे जेरबंद
वघई पोलिसांची आंतरराज्य वाहन चोरी उघड

डांग जिल्हा पोलिसांनी मालमत्तेशी संबंधित गुन्ह्यांवर आळा घालण्यासाठी सुरू केलेल्या मोहिमेअंतर्गत वघई पोलिसांना मोठे यश मिळाले आहे. महाराष्ट्रातील वणी व सुरगाणा परिसरातून चोरी केलेल्या दोन पिकअप व्हॅनसह दोन सराईत चोरट्यांना अटक करण्यात आली असून, सुमारे 4.95 लाख रुपयांचा मुद्देमाल जप्त करण्यात आला आहे.
वघई पोलीस निरीक्षक ए. एच. चावडा व त्यांची टीम वघई-आहवा रोडवर वाहन तपासणी करत असताना संशयास्पद स्थितीत जाणारी पिकअप ( MH-15-EG-2850) थांबवण्यात आली. तपासणीदरम्यान वाहनाचे कोणतेही वैध कागदपत्र सापडले नाहीत. ‘ई-गुजकॉप’ प्रणालीमध्ये तपासणी केली असता हे वाहन दुसऱ्याच व्यक्तीच्या नावावर असल्याचे आढळून आले.
पोलिसांनी सखोल चौकशी केली असता आरोपींनी हे वाहन महाराष्ट्रातील वणी येथून चोरी केल्याची कबुली दिली. तसेच सुमारे दोन महिन्यांपूर्वी सुरगाणा येथील पेट्रोल पंपावरून आणखी एक पिकअप ( MH-42-M-7630) चोरी केल्याचेही उघड झाले. ही गाडी पोलिसांनी पीपळगाव येथून जप्त केली आहे.
तपासादरम्यान मुख्य आरोपी चंद्रकांत जाधव याचे स्वतःचे पिकअप वाहन अपघातात पूर्णतः निकामी (टोटल लॉस) झाले होते. विमा रक्कम न मिळाल्याने व दुरुस्तीचा सुमारे 4 लाख रुपयांचा खर्च परवडत नसल्याने त्याने स्वतःच्या वाहनासाठी सुटे भाग मिळवण्यासाठी व कर्जाचे हप्ते फेडण्यासाठी वाहन चोरीचा मार्ग स्वीकारल्याची माहिती समोर आली आहे.
या प्रकरणी पोलिसांनी चंद्रकांत बाळुभाई जाधव (वय 31, रा. सूर्यगड, ता. सुरगाणा, जि. नाशिक) आणि मनोज संजय भोये (वय 23, रा. करंजली, ता. सुरगाणा, जि. नाशिक) यांना अटक केली आहे.
पोलिसांनी दोन पिकअप वाहनांसह दोन मोबाईल जप्त केले असून एकूण 4.95 लाख रुपयांचा मुद्देमाल हस्तगत केला आहे. पुढील तपास वघई पोलीस करत आहेत.