अभ्यासिका व हिरकणी कक्षाच्या लोकार्पणाने हरणगावला नवी ओळख

अभ्यासिका व हिरकणी कक्षाच्या लोकार्पणाने पेठ तालुक्यातील हरणगावला नवी ओळख

जि.प. नाशिकच्या मुख्य कार्यकारी अधिकाऱ्यांचा दौरा; हरणगावच्या सर्वांगीण विकासाचे कौतुक

पेठ तालुक्यातील हरणगाव येथे जिल्हा परिषद नाशिकचे मुख्य कार्यकारी अधिकारी मा. श्री ओमकार पवार साहेब यांच्या प्रमुख उपस्थितीत ज्ञानज्योती सावित्रीबाई फुले अभ्यासिका आणि माहेर घर (हिरकणी कक्ष) महिला ग्रामसंघ हरणगाव बारवपाडा यांचे भव्य लोकार्पण करण्यात आले.

यावेळी बोलताना पवार साहेब म्हणाले,
“हरणगावमध्ये स्वच्छता, नियोजन, ग्रामस्थांची एकजूट आणि प्रसन्न वातावरण पाहून मन भरून आले. हे गाव जिल्ह्यातच नव्हे तर राज्यात प्रथम येईल, याची मला खात्री आहे. मला पुन्हा एकदा येथे येण्याची संधी मिळो, अशी मनापासून इच्छा आहे.”

हरणगावच्या ऐतिहासिक पार्श्वभूमी, ग्रामस्थांची कार्यसंस्कृती आणि मुख्यमंत्री पंचायतराज अभियान अंतर्गत साधलेल्या उल्लेखनीय प्रगतीचे त्यांनी विशेष कौतुक केले. गावाच्या सर्वांगीण विकासासाठी हरणगाव हे राज्यातील आदर्श ग्राम बनू शकते, अशी अपेक्षाही त्यांनी व्यक्त केली.

मान्यवरांची उपस्थिती

या दौऱ्यात अतिरिक्त मुख्य कार्यकारी अधिकारी डॉ. अर्जुन गुंडे, जिल्हा कृषी विकास अधिकारी संजय शेवाळे, गटविकास अधिकारी जे. टी. सूर्यवंशी, सहायक कार्यक्रम अधिकारी ओमकार जाधव, सहायक गटविकास अधिकारी सुनील बागुल, विस्तार अधिकारी तसेच ग्रामपंचायत अधिकारी गायकवाड आदी मान्यवर उपस्थित होते.

कार्यक्रमाचा प्रारंभ आणि पुढील सत्र

कार्यक्रमाची सुरुवात हरणगावातील कलावंतांनी सादर केलेल्या ‘महाराष्ट्र गीत’ने झाली. उपस्थित मान्यवरांचा विजयस्तंभ प्रतिमा देऊन सत्कार करण्यात आला.
मुख्यमंत्री पंचायतराज अभियान अंतर्गत हरणगावने साधलेल्या विकासात्मक कामांचा आढावा धनंजय चव्हाण यांनी प्रभावीपणे सादर केला.

ग्रामस्थांचा उस्फूर्त सहभाग

कार्यक्रमास सरपंच पल्लवी भरसट, उपसरपंच, ग्रामपंचायत सदस्य, ग्रामपंचायत अधिकारी, गाव विकास समिती अध्यक्ष युवराज पवार, गोवर्धन गायकवाड, प्रभाकर जाधव, पंडित वाघमारे, वेणुताई जाधव, लक्ष्मण टोपले, जयश्री वाघ, विजय भरसट तसेच महिला बचतगट, तरुण मित्र मंडळ आणि ग्रामस्थ मोठ्या संख्येने उपस्थित होते.तसेच प्राथमिक व माध्यमिक विद्यालय हरणगाव येथील सर्व शिक्षक आणि विद्यार्थीही या प्रेरणादायी कार्यक्रमात सहभागी झाले.कार्यक्रमाचे सुत्रसंचालन व आभार प्रदर्शन धनंजय चव्हाण यांनी मानले.