सुरगाणा ग्रामीण रुग्णालयातील एक्स-रे मशीन गेल्या तीन महिन्यांपासून बंद! अपघातग्रस्त रुग्णांना होतोय त्रास

सुरगाणा तालुक्यातील ग्रामीण रुग्णालयातील एक्स-रे मशीन गेल्या तीन महिन्यांपासून बंद पडले असून, अद्याप त्याची दुरुस्ती झालेली नाही. जुलै महिन्यापासून मशीन बंद आहे, मात्र आरोग्य विभागाकडून आवश्यक दुरुस्ती न झाल्याने रुग्णांना प्रचंड अडचणींना सामोरे जावे लागत आहे.
दररोज अनेक रुग्ण अपघात, हाडांचे दुखणे, फ्रॅक्चर यांसारख्या समस्यांसाठी रुग्णालयात उपचारासाठी येतात. मात्र एक्स-रे सुविधा बंद असल्यामुळे रुग्णांना खासगी दवाखान्यांमध्ये जाऊन महागात एक्स-रे काढावे लागत आहेत. यामुळे गरीब आणि ग्रामीण भागातील रुग्णांवर आर्थिक भार वाढला आहे.
स्थानिक नागरिकांनी आरोग्य विभागाकडे या समस्येबाबत अनेकदा तक्रार केली असली तरी अद्याप कोणतीही ठोस कारवाई झालेली नाही. त्यामुळे नागरिक आणि रुग्णांमध्ये तीव्र नाराजी व्यक्त केली जात आहे.
नागरिकांचे म्हणणे आहे की, “अपघातग्रस्त रुग्णांना तातडीने एक्स-रे आवश्यक असतो. मात्र मशीन बंद असल्याने प्राथमिक उपचारांपलीकडे काहीच करता येत नाही.”
या गंभीर समस्येकडे आरोग्य विभागाने तातडीने लक्ष देऊन एक्स-रे मशीनची दुरुस्ती करून सेवा पुन्हा सुरू करावी, अशी मागणी सुरगाणा तालुक्यातील नागरिकांकडून होत आहे.