ब्रेकिंग न्यूज,वनपरिक्षेत्रचे दोन अधिकारी लाच स्वीकारताना ताब्यात
हायवा डंपर सोडवण्यासाठी मागितली ५० हजारांची लाच
वनपरिक्षेत्रचे दोन अधिकारी लाच स्वीकारताना ताब्यात
हायवा डंपर सोडवण्यासाठी मागितली ५० हजारांची लाच
बोरगाव | लक्ष्मण बागुल (९८२३७७९२०२)
नाशिक ग्रामीणमधील हरसूल वनपरिक्षेत्र कार्यालयात लाचलुचपत प्रतिबंधक विभागाने सापळा रचत वनपरिक्षेत्र अधिकारी व वनपाल यांना ३५ हजार रुपयांची लाच स्वीकारताना रंगेहाथ पकडले. वनपरिक्षेत्र अधिकारी कैलास नवनाथ सोनवणे (वर्ग-२) व वनपाल सुनील बाळासाहेब टोंगारे (वर्ग-३) ही वनविभागातील अधिकारी व कर्मचाऱ्यांची नावे आहेत. या प्रकरणी हरसूल पोलिस ठाणे येथे गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदाराने त्यांच्या मुलाच्या नावावर टाटा कंपनीचा हायवा डंपर २१ ऑक्टोबर २०२५ रोजी खरेदी केला होता. जुन्या घराच्या प्लास्टरसाठी खामशेत (ता. पेठ) येथील नदीतून अर्धा ब्रास वाळू भरून वाहतूक करत असताना सदर वाहन वनपरिक्षेत्र अधिकारी कैलास सोनवणे यांनी पकडले. त्यानंतर वन कायद्यानुसार गुन्हा दाखल करून हायवा डंपर जप्त करण्यात आला होता. ३१ डिसेंबर २०२५ रोजी तक्रारदार वाहन सोडविण्यासाठी हरसूल वनपरिक्षेत्र कार्यालयात गेले असता आरोपी कैलास सोनवणे यांनी एकूण ५० हजार रुपये द्यावे लागतील, अशी मागणी केल्याचे तक्रारीत नमूद आहे. याबाबत तक्रारदाराने १ जानेवारी २०२६ रोजी चिरापाली फाटा, हरसूल शिवार (ता. त्र्यंबकेश्वर) येथे लाचलुचपत प्रतिबंधक विभागाकडे समक्ष तक्रार दिली.
तक्रारीची पडताळणी केल्यानंतर आरोपी कैलास सोनवणेने ३५ हजार रुपयांची लाच मागत उर्वरित १५ हजार रुपये वाहन सोडल्यानंतर घेण्याचे मान्य केले होते. तसेच या लाच रकमेपैकी १० हजार रुपये वनपाल सुनील टोंगारे यांनी स्वतःसाठी मागितलेले होते. त्यानुसार २ जानेवारीला लाचलुचपत प्रतिबंधक विभागाने सापळा रचत हरसूल येथील वनपरिक्षेत्रीय प्रादेशिक कार्यालयात कैलास सोनवणे आणि सुनील टोंगारे यांना ३५ हजार रुपयांची लाच स्वीकारताना रंगेहाथ पकडले.
लाचलुचपत विभागाचे पोलिस अधीक्षक भारत तांगडे, अपर पोलिस अधीक्षक माधव रेड्डी, सुनील दोरगे, उपअधीक्षक स्वाती पवार यांच्या मार्गदर्शनाखाली पोलिस निरीक्षक अतुल चौधरी यांनी ही कारवाई केली. कारवाई पथकात पोलिस हवालदार शरद हेंबाडे, अविनाश पवार, युवराज खांडवी, दिनेश खैरनार, परशुराम जाधव यांचा समावेश होता. या प्रकरणी भ्रष्टाचार प्रतिबंधक अधिनियम १९८८ च्या कलम सात अन्वये गुन्हा दाखल करण्याची प्रक्रिया सुरू आहे.
