नाशिक–कनाशी बस बंद; बोरगाव परिसरातील नागरिकांचे अतोनात हाल बेहाल!

नेहमीप्रमाणे सुरू असलेली नाशिक–कनाशी ही एस.टी. बस गेल्या आठ ते दहा दिवसांपासून अचानक बंद करण्यात आल्याने बोरगाव व परिसरातील नागरिकांचे मोठ्या प्रमाणात हाल होत आहेत. सदर बस रोज सकाळी सहा ते साडेसहा वाजताच्या दरम्यान बोरगाव येथे येत असल्यामुळे नाशिकला जाणाऱ्या प्रवाशांसाठी ही अत्यंत सोयीची सेवा होती.
ही बस बंद झाल्यामुळे कामानिमित्त, शिक्षणासाठी तसेच दवाखान्यासाठी नाशिकला जाणाऱ्या नागरिकांना मोठ्या अडचणींचा सामना करावा लागत आहे. पर्यायी वाहतुकीची सोय अपुरी असल्याने प्रवाशांना खासगी वाहनांचा आधार घ्यावा लागत असून त्यामुळे आर्थिक भुर्दंडही सहन करावा लागत आहे.
स्थानिक नागरिकांमध्ये याबाबत तीव्र नाराजी व्यक्त होत असून संबंधित विभागाने तात्काळ दखल घेऊन नाशिक–कनाशी बस सेवा पूर्ववत सुरू करावी, अशी जोरदार मागणी नागरिकांकडून करण्यात येत आहे. अन्यथा आंदोलनाचा इशाराही देण्यात आला आहे.