बारागाव डांग परिसरातील सीमेलगतची गावे विकासापासून वंचित — मूलभूत सुविधांचा तीव्र अभाव
बारागाव डांग परिसरातील सीमेलगतची गावे विकासापासून वंचित — मूलभूत सुविधांचा तीव्र अभाव
सुरगाणा तालुक्यातील बारागाव डांग परिसरात गुजरात सीमेलगत असलेली अनेक गावे आजही विकासापासून वंचित आहेत. गोंदुणे, कुकुडणे, मांदा, उंबरठाण आणि खुंटविहिर या ग्रामपंचायतींचा यात समावेश असून या भागात रस्ते, आरोग्य आणि रोजगार अशा मूलभूत सुविधांचा तीव्र अभाव जाणवत आहे.
या गावांना जाण्यासाठीचे रस्ते अत्यंत खराब अवस्थेत असून पावसाळ्यात तर संपर्क पूर्णतः तुटतो. आजारी रुग्णांना उपचारांसाठी वेळेत रुग्णालयात पोहोचवणे कठीण ठरते. आरोग्य केंद्रांची कमतरता, डॉक्टर व औषधांचा अभाव यामुळे नागरिकांना मोठ्या अडचणींना सामोरे जावे लागत आहे.
रोजगाराच्या संधी नसल्याने तरुणांना मजुरीसाठी गुजरातकडे स्थलांतर करावे लागत आहे. शिक्षण, पाणीपुरवठा व वीज यांसारख्या सुविधाही अपुऱ्या असल्याने या भागातील विकास केवळ कागदावरच असल्याची भावना नागरिकांमध्ये आहे.
सीमेलगतचा दुर्गम भाग असल्याचे कारण देत प्रशासनाकडून वर्षानुवर्षे दुर्लक्ष होत असल्याचा आरोप ग्रामस्थ करत असून तातडीने पायाभूत सुविधा पुरविण्याची मागणी होत आहे. शासनाने विशेष योजना राबवून या गावांचा सर्वांगीण विकास करावा, अशी अपेक्षा नागरिकांनी व्यक्त केली आहे.
